कर्णाली प्रदेशका १० जिल्लाहरू मध्ये कालिकोट एउटा हिमाली जिल्ला हो । यस जिल्लाको कूल क्षेत्रफल १७४१ वर्ग कि.मी अर्थात १७८०३० हेक्टर रहेको छ। राष्ट्रिय जनगणना २०७८ अनुसार जिल्लाको कुल जनसंख्या १४४९१७ र घरधुरी संख्या २२,९२९ घरपरिवार संख्या २६,९५६रहेको छ। जसमा औसत परिवार संख्या ५.३८ र वार्षिक जनसंख्या वृद्धी दर ०.५४ र जनघनत्व ८३ व.कि.मी रहेको छ। ९ वटा स्थानीय तह रहेको यस जिल्लामा ३ वटा नगरपालिका र ६ वटा गाउँपालिका रहेका छन् । जम्मा ८२ वटा वडाहरु रहेका छन् । यस जिल्लाको पूर्वमा जुम्ला, पश्चिममा अछाम, उत्तरमा बाजुरा र मुगु तथा दक्षिणमा दैलेख र जाजरकोट जिल्ला पर्दछन् । जिल्लाको नामाकरणको सन्दर्भमा विभिन्न भनाई भएतापनि कालीकोट जिल्लाको साबिकको मुग्राहा गाविसको कालिका गाँउमा अवस्थित रहेको कालिका देवीको मन्दिर(माडु)बाटनै यस जिल्लाको नाम कालीकोट रहन गएको हो भन्ने जनधारणा पाइन्छ । तिला र कर्णाली नदी रहेको यस जिल्ला समुन्द्री सतह दखि ७३८ मि – ४७९० मि उचाइ सम्म फैलिएको छ । कृषि र जडिबुटीको संकलन तथा व्यापार जिविकोपार्जनको मुख्य आधार हुन ।